Hilux 4x4 Forum

“Obsene tekens”, kru-taal en aggressie.

Dít is die reaksie wat Roelf Louw, eienaar van Varswaterbaai kry wanneer hy kampeerders daarop wys dat hulle op privaateiendom is.

Varswaterbaai grens aan Trekoskraal.

Mense kamp gereeld onwettig op Trekoskraal, sowel as op die aangrensende Holbaai en Varswaterbaai. Volgens Louw, is die strukture waaronder kampeerders en dagbesoekers in die verlede kom “afpak” het, twee jaar gelede afgebreek, “maar dié goed het intussen weer een vir een opgegaan. Dis ’n nagmerrie!”

Louw en Kasper Wiehahn, die eienaar van die grond by Trekoskraal, probeer die sensitiewe gebied beskerm, maar mense los hulle rommel oral en ry elke naweek sonder enige gewetenswroeginge met hul 4x4’s en vierwielmotorfiets oor die sensitiewe duineveld en die strand. “Nêrens in die land is dit wettig om op ’n strand te ry nie. Ek weet nie hoekom mense dink hulle kan dit hiér kom doen nie,” sê Louw. Hoewel die kusreserwe (die strand tot by die hoogwatermerk en 100m land in) staatsgrond is, word kamp ook hiér verbied.

Louw sê die voertuie versteur die sensitiewe ekosisteem en swarttobies se eiers word platgery. Dit is baie moontlik dat waardevolle artifakte van die Khoisan ook in die proses vernietig word. Twee Khoisan-skelette is al in dié gebied opgegrawe, sowel as die oudste volledige Khoisan-pot wat nou in die nasionale museum in Kaapstad is. Volgens Louw word gereeld kennisgewings by sy grens opgerig wat ’n privaat-natuurreservaat aandui, maar dié borde hou nooit lank nie. “Mense haal dit uit of ry eenvoudig daaroor.” Toe Louw ’n man aangespreek het wat besig was om seevoëls te skiet, het dié glo vir hom gesê dat hy ’n Weskusser is en dat “niemand vir hom sal sê nie”.

’n Tienerseun wat op die duine by Holbaai met sy vierwielmotorfiets gery het, het krutaal gebruik en vir Louw ’n lelike teken gewys. “Dít is die tipe houding waarmee ons te doen kry,” sê Louw.

Die groot vraag is, wat word dan wel by Trekoskraal toegelaat? Volgens Wiehahn mag mense die servituutpad na die kus (wat aan die staat behoort) gebruik, maar nie die onwettige paaie op sy grond wat mense met hul 4x4’s uitgery het nie. Mense mag kom piekniek hou, die natuurskoon geniet en stap, maar niemand mag oorslaap nie. Kampeer op die strand (staatsgrond) of op die aangrensende privaatgrond, is streng verbode. Geen voertuie mag op die strand, die duine of oor die delikate fynbos ry nie. Wiehahn vra ook dat besoekers die gebied respekteer en hul rommel saamneem wanneer hulle huiswaarts keer. Hy sê die gebruik van Trekoskraal is ’n voorreg en nie ’n reg nie.