Helpende Hand

[pietpetoors]

Ek ontvang elke maand nuusbriewe van verskeie liefdadigheidsorganisasies. Ek dink nie ons besef altyd wat se nood daar in ons land is nie. Ek het besluit om die inligting van daardie nuusbriewe gereeld hier op te sit sodat meer mense kan betrokke raak by dit. Elke klein bydrae kan wel 'n verskil maak.

Hier is Helpende Hand se nuutste nuusbrief:

Helpende-Hand-Nuusbrief-November-2009.pdf

Helpende hand nuusbrief

(794.78 KiB) Downloaded 64 times

Stel ons jongmense in staat om op gelyke voet te kompeteer

Kinders uit verarmde gemeenskappe het baie struikelblokke om te oorkom. Die realiteit is dat Afrikanerjongmense ʼn hele paar ekstra struikelblokke moet oorkom om die sirkel van armoede te breek.

* Eerstens is baie Afrikaners skaam om te praat oor die nuwe stille armoede wat ons gemeenskap raak. Baie Afrikaners voel dit is nie polities korrek om oor wit armoede te praat nie. Dit is veel makliker om die probleem te ontken, te relativeer of te maak asof dit minder erg is as armoede in ander gemeenskappe.
* Tweedens word dit moeiliker vir Afrikaanse kinders om onderrig in hulle moedertaal te ontvang. Dit is nie net op skoolvlak waar die getal enkelmedium Afrikaanse skole dramaties krimp nie. Op tersiêre vlak is dit nie meer vanselfsprekend dat ʼn jongmens in Afrikaans verdere opleiding kan kry nie.
* Derdens is daar maatskaplike diskriminiasie teen minderheidsgemeenskappe. Die regering praat van “swartes en ander” en die “ander” het doodgewoon nie dieselfde maklike toegang tot staatshulp nie. Onafhanklike navorsing wys tans dat daar 131 000 wit gesinne is wat sou baat by ʼn HOP-huis. Sedert 2000 het die Tshwane-metroraad nog net vir twee wit gesinne ʼn HOP-huis gegee. Terloops, ons moet nooit daarvoor blind wees dat ander minderheidsgemeenskappe onder dieselfde maatskaplike diskriminasie ly nie. Sedert 2000 het slegs 65 bruin gesinne ʼn HOP-huis van die Tshwane-metroraad ontvang. Helpende Hand het nog nooit die nood en pyn van armoede in die swart gemeenskappe ontken nie, maar vra net ʼn regverdige en gelyke kans vir alle gemeenskappe.
* Vierdens maak die ideologies gedrewe transformasie- en regstellende aksie-beleid van die regering dit nog moeiliker vir Afrikanerjongmense om werk te kry.

Helpende Hand vra nie eksklusiewe of spesiale behandeling vir verarmde Afrikanerjongmense wat die potensiaal het om verder te studeer nie, maar ons het die verantwoordelikheid om ons kinders in staat te stel om op gelyke voet in die arbeidsmark te kompeteer.

Hoe doen Helpende Hand dit?

* Deur vir kinders van kleins af te leer hoe belangrik dit is om te leer. Die skooltassieprojek is juis daarop gemik om graad eens toe te rus met die nodige hulpmiddels sodat hulle nie met ʼn plastiek inkopiesak by die skool hoef op te daag nie. Navorsing het getoon dat indien ʼn kind se selfvertroue in die grondslagfase geknak word, die kans goed is dat hy of sy nie skool sal voltooi nie.
* Deur die Afrikaanse beursplatform verder uit bou. Finansies mag nooit ʼn rede wees waarom ʼn begaafde jongmens uit ʼn behoeftige gemeenskap nie verder kan studeer nie.
* Deur die voorbereiding van jongmense vir die arbeidsmark met behulp van ʼn nuutgestigte Beroepsleidinginstituut. Met die regte beroepskeuses en met behulp van leierskapsontwikkeling, kan ʼn jongmens met selfvertroue die toekoms betree.
* Deur gemeenskappe te mobiliseer om deur middel van Helpende Hand-takke betrokke te raak by die nood in hulle omgewing. Helpende Hand-takke staan nie net op teen onreg en diskriminasie op plaaslike vlak nie, maar gee vir kinders kosblikkies, want hulle kan slegs leer as hulle magies vol is. Helpende Hand-takke help ook jongmense wat die potensiaal het om verdere opleiding te ontvang, deur gemeenskapsbeursfondse te stig.
* Die Solidariteit-beweging veg om die blokkasies van regstellende aksie en diskriminerende transformasie te verwyder. Deur die blokkasies te verwyder, kan broodnodige vaardighede vrylik in die ekonomiese hoofstroom invloei.

[OOOOMS]

Dankie Pieter, vir die informasie, dit is nogal steurend!

[Mud Dog]

Dankie Pieter, vir die informasie, dit is nogal steurend!

Om die minste te sê, Mark. Ek dink die meeste van ons is bewus van die toestandighede, maar het geen benul oor die diepte of verspreidenheid daarvan. Als witmense is ons almal slagoffers hiervan in een of ander vorm.

[3RZ]

Solidariteit se Helpende Hand aanvaar ook enige klere, kos, huisraad ens by al die takke van Solidariteit http://www.solidariteit.co.za/Tuis/tuis.php. Ek gooi niks bruikbaars meer weg nie, alles wat ek van ontslae wil raak gaan na hulle toe, klere, komberse, matrasse, stoele, ou mikrogolfoond, hulle sorg dat dit by die regte mense uitkom wat dit kan gebruik.

[pietpetoors]

Hi Willem, is goed om te weet daar is nog iemand wat help.
Helpende hand se web adres is
http://www.helpendehand.co.za/

Teken in op hulle nuusbrief.

Hulle het nog 'n projek, die Groeifonds, wat weer help met opleiding van ons Afrikaner kinders.
Sien http://www.groeifonds.co.za/

[3RZ]

Pieter ons probeer maar help waar ons kan. Afriforum is ook een van die ander Solidaritiet inisiatiewe waar ek lid is.

http://www.afriforum.co.za/