Geen petrol, geen water in Khaudum Nasionale Park.
Posted: Fri Nov 11, 2011 3:27 pm
Die groot hoeveelheid olifanttroppe in die park wat in die noordooste van die land geleë is, dra verder tot die waterprobleem by, sê die waarnemende streekshoof oor noordoostelike parke, mnr. Phillip Steyn.
Water word met behulp van waterpompe gepomp wat deur sonpanele en kragopwekkers aangedryf word, maar die sonpanele kan nie bedags genoeg water pomp nie.
Die rooi en swart drade van die elektriese boks op die sonpaneel was omgeruil en dit het daartoe gelei dat water nie vir die diere by die watergate in die Khaudum Nasionale Park gepomp kon word nie.
Verlede naweek was daar egter geen water nie weens ’n gebrek aan petrol vir die kragopwekkers. Dit het besoekers onthuts gelaat, veral toe hulle op ’n olifantkalfie afgekom het wat moontlik vroeër verdrink het.
Sommige besoekers het self ingespring om petrol en kragopwekkers aan te ry.
Die voorval het gespreksforums op die internet, soos Facebook en die Land Cruiser Klub van Suider-Afrika laat gons.
“Ek was so kwaad toe ek in die Khaudum kom en sien hoe die diere daar behandel word as gevolg van mense wat nie hul werk kan doen nie. Daar is geen water vir hulle om te drink nie,” lui ’n inskrywing op die forum. “Ek het net daar omgedraai en ’n kragopwekker en petrol gaan haal en ons het begin pomp by een gat. Binne 15 minute was daar seker 140 olifante wat vir water gestorm het. Een olifantjie is in die proses dood.”
’n Ander besoeker vertel dat ‘n olifant wat so tussen tien en dertien jaar oud was, met die samedromming van ’n trop olifante, in die watergat gestamp is en moontlik verdrink het. ’n Dooie bastergemsbok is ook teëgekom wat moontlik van die dors gevrek het.
Die besoeker sê die naweek het al die bewaarders, behalwe een, die park verlaat om inkopies te gaan doen.
Voorts was van die elektriese drade op die sonpanele verkeerd gekoppel.
“Ons kon net by drie watergate water pomp. Hulle sonpanele werk nie, want die drade was verkeerd gekoppel. Terwyl jy by die gat staan kom die olifante uit alle rigtings,” lui ‘n inskrywing op die forum.
Die gebrek aan petrol is weens ’n gewag van sowat drie maande op petrolkaarte, maar die probleem is nou opgelos en die waterpompe pomp weer, volgens Steyn.
“Die Ministerie van die Omgewing en Toerisme het van petrolorders gebruik gemaak en dit het lank geneem voordat verskaffers betaal is.” Vulstasies was glo nie meer bereid om petrol en diesel weens agterstallige betalings aan die Ministerie te voorsien nie. Dit was Steyn se voorstel aan die Ministerie om aan elke stasie petrolkaarte uit te reik om brandstof makliker en vinniger te kry.
“Uiteindelik het ons nou ons petrolkaarte ontvang en ons kan selfs nou op Tsumkwe petrol koop en nie net meer op Rundu nie,” het ParkSteyn gesê.
“As ons nie vandeesweek die kaarte ontvang het nie, moes ek vragmotors stuur om in Windhoek te gaan volmaak.”
Voorts het Steyn bevestig dat Khaudum elke jaar probleme met water ondervind, ook weens die groot hoeveelheid olifante.
“Daar is soms ’n duisend olifante by ’n watergat en hulle hou die bastergemsbokke van die watergate weg. Ons is besig met ’n nuwe projek om spesiale krippe net vir antilope te bou om die bastergemsbokke van die olifante weg te hou,” het hy gesê. “Die balans in die natuur moet gehandhaaf word. Maak jy meer watergate, gaan jy meer olifante hê.”