Lees hier onder hoe jy betrokke kan raak om hulle te help:
Die grootste Kersgeskenk – belê in ʼn kind se toekoms
Deur Mariana Kriel
Tienduisende graad 0’s sien met groot afwagting uit om volgende jaar “groot skool” toe te gaan, terwyl duisende ouers nie weet waar hulle die geld gaan kry om te sorg dat hulle kinders die nodige skryfbehoeftes het vir die begin van hul skoolloopbaan nie.
Solidariteit Helpende Hand glo dat ʼn gebrek aan geld nie die rede moet wees waarom ʼn onskuldige graadeen sy of haar eerste skooljaar met ʼn agterstand moet begin nie. Daar is soveel struikelblokke wat ʼn kind uit ʼn behoeftige gesin moet oorkom – skryfbehoeftes en geleerdheid is nie veronderstel om een van hierdie struikelblokke te wees nie.
Aan die einde van 2007 het Solidariteit Helpende Hand vir die eerste keer die Skooltassieprojek geloods, nadat dit onder Helpende Hand se aandag gekom het dat duisende Afrikaanse gesinne nie die nodige skryfbehoeftes kan bekostig om vir hulle kinders op die eerste skooldag saam te stuur nie. Talle individue en Afrikaanse organisasies het hulle harte en beursies reeds vir hierdie projek oopgemaak. Helpende Hand kon in Januarie 2008 ongeveer 2 000 skooltassies, gevul met die nodige skryfbehoeftes, aan behoeftige Afrikaanse graadeens landswyd uitdeel.
Voor die projek nog behoorlik in 2008 kon afskop, het die aansoeke ingestroom van skole wat hulp benodig. Die aansoeke het meer as verdubbel, maar te danke aan al die Helpende Hand-ondersteuners kon Helpende Hand in Januarie 2009 die nodige skryfbehoeftes aan 4 000 Afrikaanse kindertjies voorsien. Sommige families het selfs in plaas daarvan om Kersgeskenke vir mekaar te koop, besluit om die waarde van die geskenke wat aangekoop sou word, aan die Skooltassieprojek te skenk.
In die huidige ekonomiese omstandighede verwag Helpende Hand dat die aansoeke vir 2010 kan verdriedubbel. Helpende Hand bly nogtans positief en glo dat voldoende ondersteuning van lede, die gemeenskap en ondersteuners ontvang sal word om aan die kindertjies die nodige skryfbehoeftes te voorsien.
Die grootste Kersgeskenk wat enige persoon vir ʼn kind kan gee, is ʼn toekoms. Deur die Skooltassieprojek te ondersteun, belê jy direk in die toekoms van ʼn kind.
Volgens die Verenigde Nasies se Kinderfonds is daar ʼn geweldige behoefte aan die basiese toerusting vir skoolkinders. Die eerste drie jaar van ʼn kind se skoolopleiding maak ʼn noemenswaardige verskil aan gesinsbeplanning, gesondheidsorg en ʼn gesin se inkomste.
ʼn Volledige skooltassie met skryfbehoeftes kos R200, maar enige bedrag is welkom.
Inhoud van ʼn tassie:
Witbordjie
Witbordmerker
Witborduitveër
HB-potlode
Inkleurpotlode
Skerpmaker
Skêr
Telraam
Pennesakkie/-blikke
Springtou
Boontjiesak
Liniaal
Uitveër
Inkleurboek
Uitdraaikryte/vetkryte
Gom
Hoe kan mense betrokke raak?
* SMS die woord “skooltassie” na 35960 en ʼn agent sal jou skakel. (R3 per SMS)
* Besoek die Helpende Hand-webblad by http://www.helpendehand.co.za .
* Doen ʼn direkte inbetaling in Helpende Hand se bankrekening: (verwysing: TASSIE)
Solidariteit Helpende Hand
Bank: ABSA
Tak: Centurion
Rekeningnommer: 407 225 0017
Takkode: 632 005
Met ʼn R200-bydrae vir ʼn skooltassie kan jy in die toekoms van ʼn kind belê. Vir meer inligting of om by Helpende Hand se Skooltassieprojek betrokke te raak, SMS die woord “tassie” na 35960, skakel die inbelsentrum by 0861 25 24 23, of besoek die Helpende Hand-webblad by http://www.helpendehand.co.za. Om by Helpende Hand aan te sluit, SMS die woord “hand” na 35960 en een van ons agente sal jou skakel.
(R3 per SMS. Hierdie geld dra nie tot die Skooltassieprojek by nie.)
Brief oor ʼn 7-jarige in nood
“ʼn Sewejarige seuntjie is deur sy ma op ʼn vliegtuig gesit met ʼn nota: ‘Jy is nou groot genoeg om by jou pa te gaan bly.’ Die klein boeta is deur sy ma verwaarloos.
Hy bly nou by sy ouma in Pretoria. Sy pa het op die oomblik kontrakwerk op Ogies en gaan waar daar werk is op die myne.
Die seuntjie was in ʼn skool in graad 1 hierdie jaar, maar het geen vordering getoon nie omdat hy in alle opsigte van kleintyd af verwaarloos was. Hy is ook op Ritalin. Die hoof van die skool waar hy tans is, het hom na ʼn spesiale skool verwys waar hy dan in 2010 sal begin.
Intussen versorg sy ouma ʼn bejaarde man (waar sy die oom se huis skoonmaak, kos maak, klere was, bad, ens.) en hulle woon by die oom in sy woonstel. Maar vir kos is daar nie geld. Die dame wat die ouma so dan en wan besoek het, het aan my genoem dat die ouma in die laaste drie maande 11 kg verloor het en nou net 49 kg weeg. Die rede – omdat sy die bietjie kos wat sy het, vir haar kleinseun hou.”
